Reglugerð um löggildingu heitavatnsmæla. - Brottfallin
Gildissvið.
Reglugerð þessi mælir fyrir um prófanir og löggildingu heitavatnsmæla sem eru löggildingarskyldir, sbr. 5. gr. laga nr. 100/1992 um vog, mál og faggildingu.
2. gr.
Skilgreiningar.
Frumsannprófun (EBE-frumsannprófun) er aðferð til að sannreyna að framleiðsla tækis sé í samræmi við viðurkennda frumgerð og standist mælifræðilegar kröfur, m.a. um heimiluð hámarksfrávik og merkingar. Aðferðinni er lýst nánar í viðeigandi reglugerðum.
Gerðarviðurkenning (EBE-gerðarviðurkenning) byggist á ítarlegri gerðarprófun, þar sem prófað hefur verið eftir kröfum viðkomandi tilskipana og reglugerða eða annarra kröfuskjala. Gerðarviðurkenning er forsenda frumsannprófunar og markaðssetningar eftir öðrum leiðum.
Heimiluð hámarksfrávik eru stærstu gildi sem leyfð eru fyrir frávik í reglugerðum, stöðlum og öðrum kröfuskjölum fyrir tiltekin mælitæki.
Mæligrunnur merkir áþreifanlegan mælikvarða, mælitæki eða mælibúnað til þess að skilgreina, raungera, varðveita eða birta einingu eða gildi eðlisfræðistærðar til þess að flytja þessa einingu eða stærð yfir á önnur mælitæki með samanburði.
3. gr.
Hæfniskröfur.
Löggildingaraðili skal uppfylla þær hæfniskröfur sem fram koma í reglugerð um starfshætti þeirra sem annast löggildingar mælitækja í umboði Löggildingarstofu.
Prófunarmaður skal vera vél- eða málmiðnaðarmaður eða hafa sambærilega menntun og hafa yfir að ráða nægilegri tæknikunnáttu til að annast löggildingar heitavatnsmæla og meta ástand þeirra út frá prófunum eða skoðunum. Tryggt skal að kunnáttu hans sé haldið við með endurmenntun. Hann skal kunna skil á þeim reglum sem iðnaðar- og viðskiptaráðuneytið setur varðandi heitavatnsmæla.
Tæknilegur stjórnandi skal vera verkfræðingur eða tæknifræðingur og hafa þekkingu á heitavatnsmælum og reynslu af löggildingu þeirra. Undanþágu má gera frá framangreindum skilyrðum um þekkingu og reynslu ef viðkomandi hefur menntun eða starfsreynslu og þjálfun sem faggildingarsvið Löggildingarstofu telur fullnægjandi. Tæknilegur stjórnandi er ábyrgur fyrir öllum löggildingum sem löggildingaraðili vinnur.
4. gr.
Mælitæki notuð við löggildingu.
Allir mæligrunnar, sem löggildingaraðili notar í tengslum við löggildingar heitavatnsmæla, skulu vera kvarðaðir og skal kvörðunin rekjanleg til landsmæligrunna á Íslandi.
Löggildingaraðili skal hafa yfir að ráða nauðsynlegum mælitækjum til að staðfesta að umhverfi heitavatnsmælis henti honum.
5. gr.
Aðstæður.
Flutningur löggilts heitavatnsmælis frá prófunarstofu á notkunarstað skal uppfylla kröfur gæðakerfis um flutning.
Uppsetning löggildingarskylds heitavatnsmælis skal vera í samræmi við ákvæði í reglugerðum og stöðlum og fyrirmæli framleiðanda um umhverfisaðstæður og frágang.
Heitavatnsmælar eru löggiltir á prófunarstofu þar sem tryggt hefur verið með faggildingu að kröfum um umhverfisþætti sé fullnægt.
6. gr.
Löggildingarhæfi.
Löggildingarhæfi heitavatnsmælis felst í að staðfesta með skoðun og prófun að hann uppfylli eftirfarandi atriði:
1. Ákvæði reglugerða um markaðssetningu heitavatnsmæla.
2. Að merkingar og áletranir séu í samræmi við kröfur reglugerða um markaðssetningu heitavatnsmæla.
3. Að aðstæður og notkun henti heitavatnsmælinum.
4. Að mælifræðilegir eiginleikar séu í samræmi við kröfur staðla og reglugerða um markaðssetningu heitavatnsmæla. Skal þetta staðfest með prófun. Einkum er um að ræða staðfestingu þess að kröfum um heimiluð hámarksfrávik sé fullnægt við þrenns konar rennsli.
5. Að heitavatnsmælirinn sé innsiglaður frá frumsannprófunaraðila.
6. Löggildingarstofa getur heimilað löggildingar eldri mælagerða þó að ákvæðum 1., 2. og 5. liðar sé ekki fullnægt.
Staðfesta má löggildingarhæfi nýrra mæla út frá gögnum um frumsannprófun og staðfesta má löggildingarhæfi safns heitavatnsmæla í notkun með úrtaksprófun.
7. gr.
Löggilding heitavatnsmæla.
Ekki má taka heitavatnsmæli í notkun nema að undangenginni löggildingu.
Í samræmi við 10. gr. laga nr. 100/1992 um vog, mál og faggildingu, ber ábyrgðarmanni heitavatnsmælis að sjá til þess að hann sæti reglubundnu eftirliti og uppfylli þær kröfur sem til hans eru gerðar samkvæmt lögum og reglugerðum og að löggilding hans sé ætíð í gildi.
Heitavatnsmæli má löggilda hafi löggildingarhæfi hans eða þess mælasafns sem hann tilheyrir verið staðfest með skoðun og prófun. Sé heitavatnsmælir löggildingarhæfur er festur á hann löggildingarmiði með ártali löggildingar og telst hann þá löggiltur.
Ef prófunarstofa með starfsleyfi til löggildingar heitavatnsmæla annast einnig stillingu og viðgerðir þeirra skal halda þeim verkþáttum greinilega aðskildum frá löggildingunum í samræmi við kröfur staðla.
8. gr.
Tíðni löggildinga.
Miða skal við að gildistími löggildinga fyrir mæla, sem vinna eftir aflfræðilegum lögmálum, sé 5 ár en gildistími löggildinga fyrir rafeindamæla sé 10 ár en þó fer gildistími löggildinga á heitavatnsmælum eftir gerð mæla, gæðum vatns og aðstæðum. Rekstraraðili dreifveitu og/eða eigandi mælasafns skal gera tillögu til Löggildingarstofu um lengd löggildingartímabils.
Ef unnt er að sýna fram á með úrtaksprófun að heitavatnsmælar í notkun standist settar kröfur, sem um mælana gilda, er heimilt að framlengja gildistíma viðkomandi mælasafns um allt að 2 ár vinni mælarnir eftir aflfræðilegum lögmálum en um allt að 5 ár sé um rafeindamæla að ræða.
Leggja skal aðferðir við úrtaksprófanir til samþykkis fyrir Löggildingarstofu.
9. gr.
Afturköllun löggildingar.
Löggildingin fellur úr gildi, þrátt fyrir að gildistími skv. 8. gr. sé ekki liðinn, ef:
1. heitavatnsmælir bilar,
2. innsigli frumsannprófunaraðila er rofið,
3. viðgerð er framkvæmd á heitavatnsmælinum sem áhrif getur haft á mæliniðurstöðu hans,
4. frávik eru meiri en tvöföld heimiluð hámarksfrávik.
10. gr.
Skýrslugerð.
Skýrslugerð skal vera í samræmi við verklagsreglur og reglugerð um starfshætti þeirra sem annast löggildingar mælitækja í umboði Löggildingarstofu.
Eftirfarandi upplýsingar skulu m.a. koma fram í prófunarskýrslum sem lagðar eru til grundvallar löggildingu:
1. Umsögn um merkingar.
2. Fjöldi mæla í safni og hve margir þeirra voru prófaðir.
3. Frávik við mælingu.
4. Aðstæður.
Þessar upplýsingar skulu vera aðgengilegar starfsmönnum Löggildingarstofu.
11. gr.
Málskot.
Komi upp ágreiningur um úrskurð Löggildingarstofu um einhver atriði varðandi ákvæði eða beitingu þessarar reglugerðar má skjóta málinu til ráðherra.
12. gr.
Gildistaka.
8. gr. um gildistíma á við um nýja mæla. Rekstraraðili dreifveitu og/eða eigandi eldri mæla gerir tillögur um úrtaksprófanir vegna framlengingar gildistíma þeirra. Fylgjast skal með ástandi eldra mælasafns jafnvel þótt þeir mælar verði ekki löggiltir en veita skal aðlögunartíma, 7 ár fyrir mæla sem vinna eftir aflfræðilegum lögmálum og 14 ár fyrir rafeindamæla. Að þeim tíma liðnum skulu allir mælar hafa hlotið löggildingu skv. 7. gr. og 8. gr.
Reglugerð þessi er sett með heimild í lögum nr. 100/1992 um vog, mál og faggildingu og öðlast gildi við birtingu.
Viðskiptaráðuneytinu, 18. ágúst 2000.
F. h. r.
Þorgeir Örlygsson.
Atli Freyr Guðmundsson.