1321/2024

Reglugerð um breytingu á reglugerð nr. 450/2017, um tímabundnar endurgreiðslur vegna kvikmyndagerðar á Íslandi.

1. gr.

Í stað 6. gr. a. í reglugerðinni kemur ný grein sem hljóðar svo:

Þrátt fyrir ákvæði 1. mgr. 6. gr. er heimilt að óska eftir sérstakri útborgun á endurgreiðslu að hluta (hlutaendurgreiðsla), þó framleiðslu sé ekki að öllu leyti lokið. Þetta á við um verkefni sem hafa fengið vilyrði og að lágmarki 50% af kostnaði viðkomandi verkefnis, sem fellur til á Íslandi og er endur­greiðslu­hæfur framleiðslukostnaður samkvæmt lögum nr. 43/1999, miðað við uppfærða heildar­kostnaðaráætlun, er þegar fram kominn. Slíkur hluti endurgreiðslu kemur að fullu til frádráttar fullri endurgreiðslu við lokauppgjör viðkomandi verkefnis. Sömu kröfur eru gerðar til endurgreiðslu á grundvelli þessa ákvæðis og fram koma í 6. gr., eftir því sem við á og á einungis við um kostnað við framleiðslu sem hefur verið greiddur og fellur til á Íslandi. Sérstök skilyrði hlutaendurgreiðslu eru að umsækjandi skili greinargerð um framleiðslustöðu verkefnisins þar sem eftirfarandi upp­lýsingar koma fram:

1. Gera þarf skýrlega grein fyrir hvaða kostnaðarþættir innan uppfærðrar heildarkostnaðar­áætlunar verkefnis mynda stofn til útreiknings hlutaendurgreiðslu.
2. Gera þarf skýrlega grein fyrir þeim verkþáttum sem ekki eru fullunnir og þeim kostnaði sem ekki hefur verið greiddur innan uppfærðrar heildarkostnaðaráætlunar verkefnis.

 

2. gr.

Reglugerð þessi er sett á grundvelli 8. gr. laga nr. 43/1999 og öðlast gildi 1. desember 2024.

 

Menningar- og viðskiptaráðuneytinu, 8. nóvember 2024.

 

F. h. r.

Sigrún Brynja Einarsdóttir.