Reglugerð um undanþágunefnd framhaldsskóla. - Brottfallin

1. gr.

Undanþágunefnd framhaldsskóla metur umsóknir skólameistara um lausráðningu starfsmanns sem ekki hefur leyfi menntamálaráðherra til að nota starfsheitið framhaldsskólakennari og til að starfa sem slíkur hér á landi við framhaldsskóla á vegum opinberra aðila eða aðra hliðstæða skóla sbr. 11. gr. laga nr. 86/1998 um lögverndun á starfsheiti og starfsréttindum grunnskólakennara, framhaldsskólakennara og skólastjóra.

Undanþágunefndin úrskurðar hvort umbeðin heimild skuli veitt eða henni synjað. Heimild sem veitt er á grundvelli c. liðar 4. gr. reglugerðar þessarar skal bundin því skilyrði að viðkomandi starfsmaður hafi sérmenntun í auglýstri kennslugrein.

Undanþágunefnd framhaldsskóla getur einvörðungu heimilað lausráðningu til kennslustarfa til bráðabirgða og aldrei lengur en til eins árs að fullnægðum þeim skilyrðum sem sett eru í reglugerð þessari. Starfsmaður sem ráðinn er á grundvelli heimildar undanþágunefndar framhaldsskóla skal ráðinn með sérstökum ráðningarsamningi til ákveðins tíma með þriggja mánaða gagnkvæmum uppsagnarfresti. Slíkur starfsmaður má ekki bera starfsheitið framhaldsskólakennari og ekki má endurráða hann án undangenginnar auglýsingar.

2. gr.

Menntamálaráðherra skipar undanþágunefnd framhaldsskóla til fjögurra ára í senn. Nefndin skal skipuð þremur fulltrúum, einum fulltrúa tilnefndum af heildarsamtökum kennara, einum fulltrúa tilnefndum af Háskóla Íslands og einum fulltrúa án tilnefningar og skal hann vera formaður nefndarinnar. Jafnmarga varamenn skal skipa á sama hátt.

3. gr.

Umsókn til undanþágunefndar framhaldsskóla um heimild til að lausráða tímabundið starfsmann án réttinda skal rituð á þar til gert eyðublað.

Í umsókn um undanþágu skal greina eftirfarandi:

 1.            Nákvæmar upplýsingar um það hvar og hvenær starfið var auglýst.

 2.            Heiti kennslugreinar ásamt tímafjölda eða starfshlutfalli.

 3.            Ráðningartímabil.

Með umsókn skulu fylgja eftirtalin gögn:

 a.            Ljósrit af auglýsingu.

 b.            Gögn um menntun, kennsluferil og starfsreynslu þess sem óskað er að ráða, ásamt umsögnum um starfshæfni sé fagmenntun ábótavant.

 c.            Skrá yfir alla umsækjendur um viðkomandi starf með nöfnum, kennitölum og upplýsingum um fagmenntun og hvort þeir hafi leyfisbréf á framhaldsskólastigi. Óski skólameistari þess frekar getur hann sent nefndinni umsóknir umsækjenda.

 d.            Rökstuðningur skólameistara og skólanefndar fyrir því ef umsækjandi án réttinda er tekinn fram yfir umsækjanda með leyfisbréf á framhaldsskólastigi.

4. gr.

Skilyrði fyrir því að undanþágunefnd fjalli um umsóknir skólameistara skv. 1. gr. eru:

 a.            Að laust kennslustarf í framhaldsskóla hafi verið auglýst; í samræmi við reglur nr. 464/1996 um auglýsingar á lausum störfum og 2. mgr. 18. gr. laga nr. 86/1998, þar sem kveðið er á um að í auglýsingum skuli tilgreina í hvaða kennslugrein/kennslugreinum eða á hvaða sérsviði eru laus störf. Ekki er skylt að auglýsa kennslustörf þegar um er að ræða tímabundna forfallakennslu eða til afleysinga, enda sé um framhaldsskólakennara að ræða.

 b.        Að enginn framhaldsskólakennari hafi sótt um auglýst kennslustarf þrátt fyrir ítrekaðar auglýsingar. Skólameistara er ekki skylt að leita til undanþágunefndar þegar um er að ræða kennslu sem nemur sex kennslustundum á viku eða minna.

 c.            Að þrátt fyrir að framhaldsskólakennari hafi sótt um starfið geti hvorki skólameistari né að minnsta kosti tveir skólanefndarmenn mælt með ráðningu hans.

 d.            Að upplýsingar og gögn skv. 3. gr. liggi fyrir eftir því sem við á.

5. gr.

Undanþágunefnd gætir þess að skilyrðum 4. gr. sé fullnægt áður en nefndin tekur umsókn til efnislegrar umfjöllunar. Telji nefndin að ekki hafi verið staðið rétt að auglýsingum ber henni að tilkynna það skólameistara bréflega og leita skýringa. Ef skriflegar skýringar skólameistara reynast ekki fullnægjandi að mati nefndarinnar, vísar hún umsókninni frá og kemur hún ekki til úrskurðar nefndarinnar.

6. gr.

Séu skilyrði 4. gr. uppfyllt metur undanþágunefnd umsókn og úrskurðar hvort heimila skuli að lausráða réttindalausan starfsmann til kennslu.

Undanþágunefnd framhaldsskóla ber að leggja mat á umsókn um lausráðningu starfsmanns á faglegum grunni. Nefndinni ber að byggja mat sitt á málefnalegum sjónarmiðum sem eru til þess fallin að markmið 2. gr. framhaldsskólalaga nr. 80/1996 nái fram að ganga.

Nefndin skal taka mið af upplýsingum um menntun, kennsluferil og starfsreynslu þess sem óskað er að ráða og öðrum atriðum er fram koma í umsögn er snerta hæfi hans til starfans.

7. gr.

Ef sótt er um undanþágu vegna þess að hvorki skólameistari né skólanefndarmaður treystir sér til að mæla með umsókn framhaldsskólakennara um kennslustarf ber undanþágunefndinni að gefa framhaldsskólakennaranum kost á að tjá sig um framkomin gögn í málinu áður en nefndin kveður upp úrskurð sinn.

8. gr.

Nefndin skal kveða upp úrskurð eins fljótt og verða má, að jafnaði innan tveggja vikna frá því að umsókn barst henni í hendur. Sé mál viðamikið og fyrirsjáanlegt að afgreiðsla taki lengri tíma skal nefndin tilkynna hlutaðeigandi það og tilgreina hvenær afgreiðslu sé að vænta.

9. gr.

Afl atkvæða ræður niðurstöðu nefndarinnar.

Úrskurður nefndarinnar skal vera skriflegur. Synji undanþágunefnd framhaldsskóla umsókn, skal fylgja úrskurði nefndarinnar ítarleg greinargerð þar sem fram koma þau sjónarmið sem nefndin byggir niðurstöðu sína á.

Úrskurðir nefndarinnar skulu birtir skólameistara svo fljótt sem auðið er.

Nefndin skal halda málaskrá og gerðabók. Nefndin skal árlega senda menntamálaráðherra og þeim sem tilnefna fulltrúa í nefndina skýrslu um starfsemi sína á liðnu almanaksári.

10. gr.

Undanþágunefnd og starfsmönnum hennar ber að gæta þagmælsku um öll einkamál sem þeir komast yfir í starfi sínu eða í tengslum við það. Undanþágunefnd endursendir skólameistara fylgigögn með umsókn að uppkveðnum úrskurði.

11. gr.

Unnt er að skjóta ákvörðun undanþágunefndar framhaldsskóla til menntamálaráðherra. Synji undanþágunefnd umsókn, er skólameistara óheimilt að ráða þann sem sótt var um heimild til að ráða í starfið, þrátt fyrir að úrskurði nefndarinnar hafi verið skotið til ráðherra.

12. gr.

Um málsmeðferð undanþágunefndar fer að öðru leyti skv. stjórnsýslulögum.

13. gr.

Reglugerð þessi, sem sett er skv. heimild í 20. gr. laga nr. 86/1998 um lögverndun á starfsheiti og starfsréttindum grunnskólakennara, framhaldsskólakennara og skólastjóra, öðlast þegar gildi.

Menntamálaráðuneytinu, 27. nóvember 1998.

Björn Bjarnason.

Þórunn J. Hafstein.