Reglugerð um línuívilnun. - Brottfallin
1. gr.
Frá og með 1. september 2010, má við línuveiðar dagróðrabáta með línu, sem beitt er í landi, landa 20% umfram þann afla í þorski, ýsu og steinbít sem reiknast til aflamarks þeirra, í einstökum róðrum. Einnig er heimilt við línuveiðar dagróðrabáta með línu sem stokkuð er upp í landi, að landa 15% umfram þann afla í þorski, ýsu og steinbít sem reiknast til aflamarks þeirra, í einstökum róðrum. Heimild þessi er bundin eftirfarandi skilyrðum:
- Að línan sé beitt í landi eða stokkuð upp í landi og ekki séu önnur veiðarfæri um borð í bátnum.
- Að bátur komi til löndunar innan 24 klukkustunda frá því að haldið var til veiða.
- Að sjálfvirkt tilkynningakerfi bátsins sé virkt.
- Að skipstjóri tilkynni um upphaf og lok róðurs skv. 4. gr.
- Að við skráningu afla í löndunarhöfn, í aflaupplýsingakerfið Gafl, komi fram, að veiðarfæri í tilteknum róðri hafi verið landbeitt lína eða lína stokkuð upp í landi samkvæmt upplýsingum skipstjóra.
2. gr.
Þrátt fyrir ákvæði 1. gr. skal línuívilnun í þorski á hverju fiskveiðiári takmarkast við 3.375 lestir, 2.100 lestir af ýsu og 900 lestir af steinbít, miðað við óslægðan fisk, sem skiptast þannig innan fiskveiðiársins:
|
Tímabil |
Þorskur |
Ýsa |
Steinbítur |
|
|
1. |
September - nóvember |
1.080 |
903 |
42 |
|
2. |
Desember - febrúar |
1.280 |
673 |
135 |
|
3. |
Mars - maí |
770 |
388 |
546 |
|
4. |
Júní - ágúst |
245 |
136 |
177 |
3. gr.
Fiskistofa fylgist með línuafla og tilkynnir ráðuneytinu hvenær líklegt megi telja að viðmiðunarafla hvers tímabils verði náð, sbr. 2. gr. Náist ekki að veiða viðmiðunarafla einhvers tímabils bætast ónýttar heimildir við viðmiðunarafla næsta tímabils á eftir. Ráðuneytið tilkynnir síðan frá hvaða degi tiltekinn afli reiknast að fullu til aflamarks.
4. gr.
Skipstjóri skal tilkynna Fiskistofu um upphaf róðurs áður en lagt er úr höfn. Telst róður hafinn þegar tilkynning er send. Skipstjóri skal einnig tilkynna Fiskistofu þegar komið er til hafnar til löndunar. Tilkynningar skal senda í gegnum "Símalínu", sjálfvirkan þjónustusíma Fiskistofu. Í tilkynningu skal koma fram frá hvaða höfn bátur rær, sbr. 2. tl. 1. gr.
Línuívilnun reiknast aðeins á þann afla sem endanlega er vigtaður hér á landi samkvæmt ákvæðum gildandi reglugerðar um vigtun sjávarafla, með síðari breytingum.
5. gr.
Reglugerð þessi er gefin út með stoð í 11. gr. laga nr. 116, 10. ágúst 2006, um stjórn fiskveiða, með síðari breytingum, til að öðlast gildi 1. september 2010. Jafnframt er felld úr gildi reglugerð nr. 464, 27. maí 2010, um línuívilnun, með síðari breytingum.
Sjávarútvegs- og landbúnaðarráðuneytinu, 18. ágúst 2010.
Jón Bjarnason.
Sigurgeir Þorgeirsson.