Reglugerð um Orkuveitu Reykjavíkur. - Brottfallin

REGLUGERÐ

Orkuveitu Reykjavíkur.

1. Almennt.

1. gr.

Markmið og hlutverk.

Orkuveita Reykjavíkur (OR) er fyrirtæki sem Reykjavíkurborg á og starfrækir í þeim tilgangi að afla, dreifa og selja orku á veitusvæði sínu.

OR leggur áherslu á hagkvæma nýtingu auðlinda. Skal fyrirtækið efla markaðs- og þróunarstarf í því skyni að afla markaða fyrir orkuframleiðslu sína og auka nýtingu vistvænna orkugjafa.

OR er heimilt að starfa á ýmsum tæknisviðum í því skyni að stuðla að bættri nýtingu dreifikerfis síns, enda sé sá rekstur bókhaldslega aðskilinn öðrum rekstri OR.

Þá er fyrirtækinu heimilt að eiga önnur fyrirtæki, að öllu leyti eða með öðrum, þ.m.t. hlutafélög, er vinna að framgangi verkefna tengdum starfssviði félagsins.

OR skal rekin sem sjálfstætt fyrirtæki með sérstakri stjórn, sem starfar í umboði borgarstjórnar og samkvæmt sérstökum samþykktum er borgarstjórn samþykkir.

2. gr.

Verksvið og veitusvæði.

OR vinnur raforku í eigin orkuverum eða kaupir af öðrum, veitir og selur um dreifikerfi sitt.

OR vinnur heitt vatn og jarðgufu úr eigin borholum eða kaupir af öðrum, veitir og selur um dreifikerfi sitt.

Veitusvæði OR er lögsagnarumdæmi Reykjavíkurborgar svo og nágrannabyggðir, eftir því sem borgarstjórn semur um og ákveður og ráðherra samþykkir.

OR hefur einkarétt til sölu heits vatns, jarðgufu og raforku á orkuveitusvæði sínu, í samræmi við samninga og gildandi lög og reglugerðir hverju sinni.

3. gr.

Stjórn.

Stjórn OR er í höndum stjórnar og forstjóra í umboði borgarstjórnar. Stjórn OR er skipuð fimm aðalmönnum og jafnmörgum til vara og er hún kjörin hlutfallskosningu í borgarstjórn Reykjavíkur, til jafnlengdar kjörtímabili borgarstjórnar. Borgarstjórn kýs formann stjórnarinnar. Stjórnin skiptir sjálf með sér verkum. Rétt til setu á stjórnarfundum með málfrelsi og tilllögurétt hafa tveir fulltrúar starfsmanna sem þeir kjósa úr sínum hópi.

Stjórn OR skal setja fyrirtækinu skipurit. Stjórnin setur fyrirtækinu verðskrá og fjárhagsáætlun sem staðfest skal í borgarstjórn. Stjórnarfundir eru lögmætir ef meirihluti stjórnarmanna sækir fund. Afl atkvæða ræður afgreiðslu mála. Halda skal fundargerð um stjórnarfundi. Formaður boðar til stjórnarfunda. Hver stjórnarmaður getur krafist stjórnarfundar. Sama rétt á forstjóri.

4. gr.

Forstjóri.

Forstjóri hefur á hendi framkvæmd stefnu stjórnar fyrirtækisins. Skal hann og vinna sjálfstætt að stefnumótun þess og áætlanagerð. Hann annast allan daglegan rekstur fyrirtækisins, allar framkvæmdir þess og undirbúning þeirra, sjóðvörslu og reikningshald og ráðningu starfsliðs. Hann kemur og fram fyrir þess hönd í öllum málum sem varða venjulegan rekstur. Forstjóra ber að veita stjórn, endurskoðanda og borgarráði allar upplýsingar um rekstur fyrirtækisins sem þeir kunna að óska eða veita ber samkvæmt lögum. Stjórn skal setja forstjóra starfslýsingu.

5. gr.

Reikningshald og ráðstöfun tekna.

OR hefur sjálfstætt reikningshald og tekur sjálf við greiðslu fyrir selda orku og öðrum tekjum. Skal tekjunum varið til að standa straum af öllum greiðsluskuldbindingum, svo sem afborgunum á áhvílandi skuldum, vöxtum og öðrum rekstrarkostnaði, þar með talið fullnægjandi viðhald og endurnýjun mannvirkja og tækja.

Við það skal miðað að OR skili eðlilegum arði miðað við það fjármagn sem á hverjum tíma er bundið í fyrirtækinu. Ákvörðun um ráðstöfun arðsins skal tekin af eiganda.

Rekstur hinna ýmsu deilda OR skal aðgreindur reikningslega og fjárhagslega í samræmi við þarfir OR og lagaáskilnað. Aðgreiningunni skal háttað þannig að unnt sé að sannreyna raunverulegan kostnað af orkuöflun, flutningi, dreifingu og sölu. Sameiginlegum kostnaði skal skipt á hinar ýmsu deildir samkvæmt áætlun sem staðfest skal af stjórn OR.

Við rekstur OR skal þess gætt að samkeppnisrekstur sé ekki niðurgreiddur af einkaréttar- eða verndaðri starfsemi.

2. Nýsköpun og þróun.

6. gr.

Markaðs- og þróunarstarf.

Innan OR skal starfrækt sérstakt svið eða deild sem sinnir markaðsstarfi vegna sölu á orku og þróunar- og rannsóknarverkefnum tengdum orkuiðnaði, hérlendis og erlendis. Skal starfsemi þessari markaður rammi í stefnumótun fyrirtækisins.

3. Orkuöflun.

7. gr.

Öflun orku.

OR aflar orku í eigin orkuverum eða með kaupum á markaði.

OR er heimilt að kaupa orkuver og starfrækja þessi mannvirki, enda fáist til þess tilskilin leyfi.

4. Orkuveita.

8. gr.

Orkuflutningur og dreifing.

OR flytur orku um eigin flutnings-, aðveitu-, og dreifikerfi, eða eftir slíkum kerfum í eigu annarra enda fáist til þess tilskilin leyfi. OR er heimilt að kaupa flutnings-, aðveitu- og dreifikerfi af öðrum til eigin nota eða rekstrar.

OR annast lagningu, viðhald og endurnýjun flutnings-, aðveitu- og dreifikerfis, þ.m.t. heimtauga og heimæða.

9. gr.

Húsveitur.

OR er heimilt að setja í tengiskilmála ákvæði um lagningu heimtauga og heimæða og tengingu þeirra við húsveitur húseigenda. Húsveita sem tengist veitukerfi OR skal fullnægja kröfum sem settar eru í reglugerðum og tengiskilmálum.

Heimtaugar með stofnvari og heimæðar ásamt tengigrind eru eign OR ef ekki er sérstaklega um annað samið og þótt tengigjald hafi verið greitt.

Nú eru sérstakir erfiðleikar á tengingu húss og getur OR þá ákveðið að húsið skuli tengt dreifikerfi þess með takmörkunum. Fullnægi húsveita ekki þeim skilyrðum sem sett eru í orkulögum, skipulagslögum, byggingarlögum eða reglugerðum settum samkvæmt þeim, þá getur OR ákveðið að tengja hús með takmörkunum eða að hús sé ekki tengt.

Umsókn um heimtaug og heimæð eða breytingar á þeim skal undirrituð af húseiganda er skuldbindur sig jafnframt til þess með undirskrift sinni að greiða tengigjald það sem kveðið er á um í verðskrá OR. Húseigandi ber kostnað við þær breytingar á heimtaugum og heimæðum sem framkvæmdar eru að hans ósk. Þegar heimæð eða heimtaug hefur verið tengd er tengigjald gjaldkræft.

Telji OR nauðsynlegt að komið verði upp tengivirki í húsi eða á lóð viðkomandi húseignar vegna væntanlegrar orkuafhendingar, skal OR látið í té húsrými með sérstökum samningi eða ókeypis lóð. Þetta gildir þó aðeins ef um er að ræða mikla orkunotkun og hagkvæmnissjónarmið eiga við að mati OR.

Óski OR eftir spennubreytingu á húsveitu, er húseiganda/orkukaupanda skylt að hlíta því, enda sé breytingin gerð á kostnað OR.

Viðskiptavinur skal gæta þess að ekki sé hætta á að vatn frjósi í tengigrind eða inntaki og viðskiptavinur skal tryggja nægjanlegt rennsli til þess. Sé þess ekki kostur ber honum að tilkynna það OR eins fljótt og auðið er, svo unnt sé að aftengja húsið. Kostnaður við það skal greiddur af viðskiptavini samkvæmt verðskrá.

OR getur krafist breytinga á húsveitum eða sett skilyrði fyrir tengingu þeirra ef af þeim er bein slysahætta og ef tækjabúnaður eða virkni húsveitna hafa óæskileg áhrif á rekstur veitukerfa OR eða á nærliggjandi viðskiptavini. Sinni viðskiptavinur ekki kröfum OR um úrbætur er heimilt að stöðva orkuafhendingu.

Ef viðskiptavinur óskar eftir því að aftengjast dreifikerfinu um tíma, er heimilt að taka aukagjald samkvæmt verðskrá.

10. gr.

Takmörkun á orkuafhendingu.

Komi til skömmtunar á heitu vatni í lengri eða skemmri tíma, skal þess gætt að orka til húshitunar njóti forgangs.

Við afhendingu orku til fjarliggjandi staða eða til staða þar sem lóðareigendur neita að leggja til lóð fyrir nauðsynlega spennistöð og lóð eða aðstöðu fyrir stólpa eða festur fyrir raflínur án endurgjalds, getur OR krafist sérstakra greiðslna frá viðskiptavini. Á þeim stöðum í veitukerfinu, þar sem flutningsgeta þess leyfir ekki hið umbeðna afl án sérstakra ráðstafana, ákveður OR nánari skilmála.

OR er ekki skylt að veita afslátt af sölu heits vatns vegna lágs hitastigs þess á afhendingarstað enda geri OR þær ráðstafanir sem má ætlast til af henni til að halda hitastiginu í eðlilegu horfi.

OR er heimilt að nota bakrennslisvatn sem runnið hefur í gegnum húsveitur.

11. gr.

Takmörkuð bótaábyrgð.

Stöðvun á rekstri veitunnar, eða hluta hennar, vegna viðgerða og tenginga skal tilkynna fyrirfram ef unnt er, og koma skal á eðlilegum rekstri aftur svo fljótt sem unnt er.

Réttur viðskiptavinar til afnota af hitaveituvatni skuldbindur ekki OR til þess að tryggja að þrýstingur í dreifiæðum sé ávallt nægilegur, enda geri OR þær ráðstafanir sem ætlast má til af henni til að halda þrýstingnum í eðlilegu horfi.

OR undanþiggur sig, að svo miklu leyti sem lög um skaðsemisábyrgð nr. 25/1991 heimila, bótaábyrgð á tjóni, jafnt beinu sem óbeinu, sem rekja má til frosts, bilana eða takmarkana á orkuvinnslunni, spennubreytinga rafmagns, þrýstibreytinga heits vatns, stöðvunar orkuafhendingar eða annarra óviðráðanlegra atvika. Sama gildir ef rennsli í hitaveituæð er stöðvað eða rafstraumur rofinn vegna viðgerða eða annarra nauðsynlegra aðgerða OR. Viðskiptavinir eiga ekki bótakröfu á hendur OR, þótt straumur hafi verið rofinn eða rennsli stöðvað fyrirvaralaust.

OR ber ekki ábyrgð á óbeinu eða afleiddu tjóni orkukaupanda eða húseiganda. OR tekur ekki ábyrgð á veitu viðskiptavinar með úttekt eða tengingum.

Ábyrgðartakmörkun samkvæmt þessari grein er bundin því að beint tjón orkukaupanda/ húseiganda verði ekki rakið til mistaka starfsmanna OR.

12. gr.

Mælar.

OR á og setur upp nauðsynlegan mælibúnað vegna sölu og ákveður fjölda, tegund og staðsetningu. Mælibúnaðinn má ekki flytja til án samþykkis OR en OR getur krafist flutnings hans, ef staðsetningin er óhentug. Starfsmenn OR skulu ætíð hafa aðgang að mælibúnaði og þeir einir mega rjúfa innsigli hans.

Verði mælitæki fyrir óvenjulegu hnjaski eða skemmdum er heimilt að skylda þann orkukaupanda sem ábyrgur er fyrir notkun um mælitækið til að greiða kostnað við viðhald eða endurnýjun þess.

Mælitæki telst sýna rétt ef mesta skekkja þess er innan 5% marka. Hafi mælitækið sýnt meira en sem nemur mestri leyfilegri skekkju þess, ber félaginu að leiðrétta reikninga viðkomandi orkukaupanda. Hafi mælitækið sýnt minna en sem nemur mestri leyfilegri skekkju þess er félaginu heimilt að leiðrétta reikninga viðkomandi viðskiptavinar, enda sé um veruleg frávik frá hámarksskekkju að ræða.

Við leiðréttingu á reikningum skal miða við mælt frávik mælisins að teknu tilliti til fyrri notkunar viðkomandi orkukaupanda og annarra aðstæðna sem gefið gætu vísbendingar um það hvenær mælitækið bilaði. Ekki skal miða leiðréttingu reikninga við lengra tímabil en eitt ár enda hafi orkukaupanda ekki verið ljóst eða mátt vera það ljóst, að um bilun mælitækis væri að ræða.

5. Orkusala.

13. gr.

Sala orku.

OR selur orku í samræmi við reglugerð þessa, tengiskilmála og verðskrá.

OR er heimilt að gera sérsamninga um sölu á þjónustu og orku.

OR skal setja sér verðskrá sem samþykkt skal í borgarstjórn og staðfest af ráðherra.

14. gr.

Orkureikningar.

Notkunargjöld verða krafin mánaðarlega samkvæmt nánari ákvæðum verðskrár, en heimilt er að láta lengri tíma líða milli gjalddaga. Við verðbreytingar á orku og fastagjöldum skal reikningsfæra notkun í beinu hlutfalli við gildistíma hverrar verðskrár á því tímabili sem reikningurinn tekur til. OR ákveður gjalddaga reikninga.

OR má byggja orkureikninga á áætlun um orkunotkun viðskiptavinar og innheimta reglulega skv. slíkri áætlun. Reikningar sem eru byggðir á orkunotkun nefnast _uppgjörsreikningar", en reikningar sem eru byggðir á áætlaðri orkunotkun nefnast _áætlunarreikningar".

Orkunotkun skal sannreyna u.þ.b. árlega. Þegar orkunotkun hefur verið sannreynd skal hún reikningsfærð og gerð upp fyrir tímabilið milli álestra og koma þá áætlunarreikningar til frádráttar.

Leiði aukin orkunotkun af galla á búnaði orkukaupanda, er OR ekki skylt að lækka orkureikning vegna þess.

Viðskiptavinur getur jafnan, gegn greiðslu aukagjalds, krafist aukaálestrar og uppgjörs miðað við mælda notkun. Enn fremur getur hann óskað eftir breytingu á áætlun um orkunotkun vegna nýrra forsendna.

Heimilt er að skipta reikningi vegna orkukaupa um einn mæli. Sé það gert bera orkukaupendur um þann mæli hver um sig ábyrgð in solidum á greiðslu hvers reiknings. Við vanskil á einum eða fleiri reikningum er heimilt að stöðva orkuafhendingu um hinn sameiginlega mæli. Bera viðkomandi viðskiptavinir allan aukakostnað sem hinni auknu þjónustu er samfara.

Reikninga skal að jafnaði senda viðskiptavini á notkunarstað.

Heimilt er að beita rafrænni greiðslumiðlun til greiðslu á reikningum að ósk viðskiptavinar. Í þeim tilfellum skal senda viðkomandi viðskiptavini yfirlit um skuldfærslur og notkun árlega. Notkun greiðslumæla er heimil með samþykki OR og viðskiptavinar.

Viðskiptavinum er skylt að hlíta ákvæðum gildandi verðskrár og breytingum sem þar kunna að verða á.

Verði greiðslufall á reikningi, hvort sem um er að ræða áætlunar- eða uppgjörsreikning, má OR áskilja sér og innheimta dráttarvexti frá og með gjalddaga reiknings til greiðsludags, auk kostnaðar sem af innheimtu kröfunnar hlýst.

15. gr.

Lokun fyrir orkuafhendingu.

OR hefur rétt til að loka fyrir rafmagn og rennsli heits vatns að húsi eða íbúð viðskiptavinar, sem vanrækir að greiða orkureikninga eða vanrækir skyldur sínar skv. reglugerð þessari. Til slíkra aðgerða má þó fyrst grípa eftir gjalddaga og að undangenginni skriflegri aðvörun, sem send er viðskiptavini með hæfilegum fyrirvara, sem eigi skal vera skemmri en þrír dagar. OR ber ekki ábyrgð á hugsanlegum afleiðingum slíkrar lokunar.

Heimild þessi er til staðar hvort sem um er að ræða uppgjörsreikning eða áætlunarreikning.

Beri viðskiptavinur ábyrgð á orkukaupum um fleiri en einn mæli má stöðva orkuafhendingu um hvern þeirra sem er eða alla, vegna vanskila eða vanefnda í sambandi við einn þeirra.

Stöðvun orkuafhendingar hefur engin áhrif á greiðsluskyldu orkukaupenda á skuldum við OR.

Skuldari greiðir allan kostnað af lokun og opnun á ný samkvæmt verðskrá hverju sinni.

Sé lokað vegna vanskila getur OR ákveðið að opna ekki aftur, nema ekki sé lengur um vanskil eða aðrar vanefndir að ræða og/eða trygging sé sett fyrir skilvísri greiðslu framvegis.

16. gr.

Orkukaupendur.

Skráður orkukaupandi ber ábyrgð á notkun um þau mælitæki húsveitunnar sem hann er skráður fyrir, þar til hann lætur af notkun hennar og hefur sagt upp notkun eða tilkynnt flutning. Uppsögn eða flutning skal tilkynna OR með eðlilegum fyrirvara, sem annast lokaálestur.

OR getur átt kröfu á hendur öðrum en skráðum notanda, færi OR sönnur fram á að um málamyndagerning sé að ræða.

Hafi eigi annar viðskiptavinur sótt um að fá mælitæki skráð á sitt nafn, skal loka því, og eigi skal hefja orkusölu á ný um tækið, fyrr en tilkynnt hefur verið um nýjan kaupanda.

Tilkynningu um breytingu á notkun, þ.e. hún geti fallið undir annan verðskrárlið, skal senda OR með mánaðarfyrirvara.

Ef húseigandi eða trúnaðamaður hans verður þess var, að orkukaupendaskipti hafa orðið, án þess að þau hafi verið tilkynnt OR, ber honum að gera OR aðvart um það án tafar. Vanræki húseigandi þessa tilkynningarskyldu sína ber hann einfalda ábyrgð vegna ógreiddrar orkunotkunar þess aðila.

6. Misnotkun - viðurlög.

17. gr.

Misnotkun.

Verði uppvíst að orka hafi verið notuð með öðrum hætti en um er samið, raskað hafi verið mælitækjum eða breytt tengingum þannig, að ekki komi fram öll notkun, skal OR áætla þá orku sem notuð hefur verið í óleyfi og gera reikning fyrir þá orku í samræmi við verðskrá og skal notandi greiða fyrir það verð eftir verðskrá þann tíma sem liðinn er frá síðasta aflestri. Ef ekki liggja fyrir sérstakar upplýsingar um sennilega notkun má miða við undangengna hámarksnotkun. Við endurtekningu skal rjúfa tengingar viðkomandi við veitukerfið.

18. gr.

Viðurlög.

Brot á reglugerð þessari eða skilmálum OR varðar sektum nema þyngri refsing liggi við samkvæmt lögum eða öðrum refsiheimildum. Með mál út af slíkum brotum skal fara að hætti opinberra mála. Sektir renna í ríkissjóð.

Brot á reglugerð þessari getur og varðað bótaskyldu samkvæmt almennum reglum.

Vanræki viðskiptavinur að gera úrbætur sem OR hefur mælt fyrir um, í samræmi við reglugerð þessa, getur OR látið framkvæma það sem þörf krefur, á kostnað viðskiptavinar.

7. Gildistaka.

19. gr.

Gildistaka.

Reglugerð þessi sem samþykkt er af borgarstjórn Reykjavíkur er hér með staðfest skv. lögum um Hitaveitu Reykjavíkur nr. 38, 12. febrúar 1940 og orkulögum nr. 58 29. apríl 1967 og öðlast þegar gildi. Jafnframt eru úr gildi felldar eftirfarandi reglugerðir: Rg. nr. 451/1977, sbr. rg. nr. 776/1983 og nr. 132/1989 fyrir Rafmagnsveitu Reykjavíkur og nr. 208/1961, sbr. 122/1979 um hitalagnir o.fl. í Reykjavík og nr. 406/1989 um Hitaveitu Reykjavíkur.

Ákvæði til bráðabirgða.

I.

Hitaveita Reykjavíkur og Rafmagnsveita Reykjavíkur.

Orkuveita Reykjavíkur er stofnuð með ákvörðun borgarstjórnar Reykjavíkur.

OR yfirtekur starfsemi Hitaveitu Reykjavíkur og Rafmagnsveitu Reykjavíkur frá og með 1. janúar 1999. OR yfirtekur eignir og skuldir Hitaveitu Reykjavíkur og Rafmagnsveitu Reykjavíkur miðað við sama dag. Verðmæti eigna og réttinda hvors fyrirtækis um sig skal endurmetið við stofnun OR. OR yfirtekur með sama hætti allar skuldbindingar, skyldur og réttindi veitustofnananna beggja með sérstakri tilkynningu borgarstjórnar og OR til viðsemjenda þeirra, enda helst ábyrgð borgarsjóðs óbreytt á öllum fyrri skuldbindingum veitustofnananna.

Þrátt fyrir setningu reglugerðar þessarar skulu áfram vera í gildi tengiskilmálar og verðskrár Hitaveitu Reykjavíkur og Rafmagnsveitu Reykjavíkur, þar til endurskoðun þeirra hefur farið fram.

II.

Starfsmenn.

Vegna sameiningar Hitaveitu Reykjavíkur og Rafmagnsveitu Reykjavíkur skulu allir starfsmenn eiga rétt á starfi hjá Orkuveitu Reykjavíkur á sambærilegum kjörum. Skulu þeir halda óbreyttri réttarstöðu gagnvart Reykjavíkurborg.

Iðnaðarráðuneytinu, 30. desember 1998.

F. h. r.

Jón Ingimarsson.

Steinunn Bjarman.