1441/2024

Reglugerð um úthlutun aflamarks í grásleppu til nýliða.

1. gr.

Gildissvið.

Reglugerð þessi gildir um úthlutun aflamarks í grásleppu til skipa í eigu nýliða samkvæmt 7. mgr. 8. gr. laga um stjórn fiskveiða, nr. 116/2006.

 

2. gr.

Nýliði.

Nýliði samkvæmt reglugerð þessari telst sá aðili sem á skip, sem ekki hefur skráða aflahlutdeild og hefur ekki fengið úthlutað aflahlutdeild í grásleppu vegna fiskveiðiársins 2024/2025.

 

3. gr.

Auglýsing og umsókn um aflamark í grásleppu.

Fiskistofa auglýsir eftir umsóknum um aflamark í grásleppu fyrir skip í eigu nýliða á hverju fiskveiði­ári.

Aflamark í grásleppu til úthlutunar til nýliða er miðað við það magn sem tilgreint er í reglugerð um veiðar í atvinnuskyni sem gildir fyrir viðkomandi fiskveiðiár og almanaksár.

Umsókn skal skilað á því formi sem Fiskistofa ákveður. Í umsókn um aflamark í grásleppu til nýliða skulu eftirfarandi upplýsingar koma fram:

1. Nafn, kennitala og lögheimili umsækjanda.
2. Fiskiskip sem óskað er að aflamark verði skráð á.
3. Á hvaða staðbundna veiðisvæði fiskiskip muni stunda veiðar.

 

4. gr.

Úthlutun aflamarks.

Aflamarki í grásleppu til nýliða skv. 7. mgr. 8. gr. laga um stjórn fiskveiða skal Fiskistofa úthluta árlega til skipa í eigu nýliða skv. 2. gr.

Fiskistofa skal úthluta aflamarki í grásleppu til skips nýliða á grundvelli umsókna skv. 3. gr. Afla­mark í grásleppu skal skiptast jafnt á milli nýliða. Hver nýliði getur að hámarki fengið 0,4% af afla­marki leyfilegs heildarafla í grásleppu á viðkomandi fiskveiðiári úthlutað á skip.

Eftirstöðvum óráðstafaðs aflamarks í grásleppu til nýliða skal Fiskistofa ráðstafa til skipa með aflahlutdeild í grásleppu á þeim degi sem úthlutun aflamarks til nýliða fer fram.

 

5. gr.

Gildistaka.

Reglugerð þessi er sett skv. 2. mgr. 7. gr. laga um veiðar í fiskveiðilandhelgi Íslands, nr. 79/1997 og 6. mgr. 8. gr. laga um stjórn fiskveiða, nr. 116/2006. Reglugerðin öðlast þegar gildi.

 

Matvælaráðuneytinu, 25. nóvember 2024.

 

Bjarni Benediktsson.